مشرقِ وسطیٰ تنازع: پاکستان کا سفارتی حل پر زور، قیاس آرائیوں سے گریز کی ہدایت
اسلام آباد: ترجمان دفتر خارجہ نے کہا ہے کہ پاکستان مشرقِ وسطیٰ کے تنازع کے حل کے لیے سفارتی ذرائع کے ذریعے آگے بڑھنے کے عزم پر قائم ہے۔
وفاقی دارالحکومت سے جاری بیان میں ترجمان نے واضح کیا کہ پاکستان اپنی خارجہ پالیسی کے مطابق خلیجِ فارس میں جاری جنگ کے خاتمے کے لیے سفارت کاری اور باہمی روابط کو ترجیح دے رہا ہے۔
ترجمان کے مطابق سفارت کاری اور مذاکرات کے عمل میں بعض امور کو صوابدید اور خاموشی کے ساتھ آگے بڑھانا ضروری ہوتا ہے، اس لیے ذرائع ابلاغ سے توقع کی جاتی ہے کہ وہ قیاس آرائیوں سے گریز کریں اور فیصلوں و نتائج سے متعلق سرکاری اعلانات کا انتظار کریں۔
یاد رہے کہ پاکستان کی خارجہ پالیسی کا مستقل موقف رہا ہے کہ مشرق وسطیٰ کے تمام تنازعات، بشمول غزہ کی صورتحال، ایران-اسرائیل کشیدگی اور حالیہ امریکا-ایران تنازع، کا حل صرف سفارت کاری، مذاکرات اور پرامن ذرائع سے ممکن ہے۔
مزید برآں نائب وزیراعظم و وزیر خارجہ نے ترکیہ، عراق، سعودی عرب اور دیگر ممالک کے ہم منصبوں سے رابطے کیے اور اجتماعی طور پر خطے میں کشیدگی کم کرنے پر زور دیا۔
