پاکستان کرکٹ ٹیم نے آسٹریلیا کے خلاف راولپنڈی میں کھیلے جانے والے پہلے ایک روزہ میچ کے ساتھ ون ڈے کرکٹ کی تاریخ میں ایک ہزار میچز مکمل کرنے کا اعزاز حاصل کر لیا ہے۔
قومی ٹیم یہ تاریخی سنگ میل عبور کرنے والی دنیا کی تیسری ٹیم بن گئی ہے جبکہ اس سے پہلے بھارت اور آسٹریلیا بھی ایک ہزار ون ڈے میچز کھیل چکی ہیں۔
پاکستان کے ون ڈے سفر پر نظر ڈالی جائے تو قومی ٹیم نے 999 میچز میں 527 کامیابیاں حاصل کیں جبکہ 442 میچز میں شکست کا سامنا کرنا پڑا۔ اس کے علاوہ 9 میچز برابر اور 12 مقابلے بغیر کسی نتیجے کے ختم ہوئے۔
قومی ٹیم نے ون ڈے کرکٹ میں متعدد تاریخی فتوحات اور یادگار کارکردگیوں کے ذریعے عالمی کرکٹ میں اپنا منفرد مقام بنایا۔
اعداد و شمار کے مطابق پاکستان کا ایک روزہ کرکٹ میں سب سے بڑا مجموعہ 399 رنز ہے جبکہ کم ترین اسکور 43 رنز رہا ہے۔ حیران کن طور پر قومی ٹیم اب تک 400 رنز کا ہندسہ عبور نہیں کر سکی۔
